O auto da Audiencia Provincial, notificado no día de onte, establece de forma clara e contundente que non se aprecia ilícito penal na actuación de Benito Portela como alcalde de Sada. Nin houbo o delito de desobediencia que denunciaba o Sr. Carballo nin tampouco ilícito penal ningún na actuación do alcalde.
Segundo confirma o auto da Sección Número 2 da Audiencia Provincial da Coruña, os feitos trasladados na denuncia son irrelevantes penalmente e recolle, de xeito textual, que: “La Sala no ve factible situar en algún precepto del Código Penal la conducta del Sr. Portela ni siquiera empleando un ilimitado motor de búsqueda de ilegalidades”.
Asemade, os maxistrados aseguran na súa resolución que a versión dos feitos formulada polo entón alcalde de Sada foi convincente, á vista, tamén, das testemuñas dos funcionarios municipais que prestaron declaración.
Con este novo auto queda de manifesto que a actuación de Benito Portela neste procedemento estivo marcada polo estrito cumprimento da legalidade e a defensa do interese público. Máis unha vez, arquívase unha denuncia penal contra a súa persoa e, unha vez máis, fracasan as escuras estratexias de apartar a Benito Portela da política institucional.
“Nin con moción de censura de tránsfugas, nin con denuncias penais conseguirán botarme da vida pública. Será a cidadanía de Sada quen, libre e democraticamente, teña a palabra o 28 de maio”, declara o candidato á Alcaldía por Sadamaioría.
Sada, 13 de abril de 2023.
