Sadamaioría leva a pleno unha moción en defensa dos Dereitos Humanos e contra a guerra e invasión de Israel en Palestina

EXPOSICIÓN DE MOTIVOS

Desde hai décadas, o conflito entre Israel e Palestina provocou un sufrimento incesante para os pobos involucrados, especialmente para a poboación civil palestina. A situación tense agravado a través dos anos debido a unha serie de eventos que inclúen, entre outros, a ocupación militar, ataques terroristas, desprazamentos forzados, bloqueos económicos e operacións militares. As accións concretas para poñer fin á violencia e buscar unha solución pacífica e duradeira ao conflito aínda están lonxe de lograrse.

Nos últimos meses, e especialmente nestes días, a escalada de violencia alcanzou niveis alarmantes, con ataques indiscriminados que resultaron na morte de civís, incluíndo nenos e mulleres. Os bombardeos e operacións militares israelís levaron á destrución de infraestruturas esenciais como hospitais, escolas e subministracións de auga e electricidade, empeorando aínda máis a situación da poboación civil. Por outra banda, non é posible obviar os ataques terroristas executados por Hamas que, coma o perpetrado o pasado 7 de outubro, implicaron o asasinato e secuestro de decenas de persoas, algunhas das cales seguen a día de hoxe en mans desta organización. A comunidade internacional, incluíndo organizacións de Dereitos Humanos e organismos das Nacións Unidas, condenaron repetidamente as accións de Israel e a violencia de Hamas e chamaron á fin da ocupación e ao respecto polos dereitos humanos dos palestinos.

A comunidade internacional ten a responsabilidade de actuar para protexer aos civís e asegurar que se respecten os principios do dereito internacional humanitario. Neste sentido, o paso adiante dado polo goberno de España para o recoñecemento oficial, por primeira vez na Historia, do Estado Palestino abre o camiño a máis iniciativas que garantan os dereitos e aspiracións lexítimas do pobo Palestino.

Considerando que a Carta das Nacións Unidas e o Dereito Internacional Humanitario esixen a protección dos civís en situacións de conflito armado. Que os principios de xustiza, igualdade e respecto aos dereitos humanos son fundamentais para unha convivencia pacífica entre os pobos. Que a Comunidade Internacional, incluídos os gobernos locais, temos a responsabilidade de denunciar e actuar contra as violacións dos dereitos humanos e avogar pola paz e a xustiza.

Tendo en conta o anteriormente exposto, Sadamaioría presenta para a súa aprobación no pleno da corporación do Concello de Sada esta moción, propoñendo a adopcións dos seguintes ACORDOS:

1. Condenar enerxicamente a violencia e as agresións levadas a cabo contra a poboación civil, manifestando a nosa solidariedade co pobo palestino, especialmente coas vítimas desta escalada de violencia e as súas familias.

2. Esixir un alto o fogo inmediato e o cese de todas as accións militares que poñen en risco a vida de civís.

3. Pedir ao Goberno de España que emprenda todas as medidas diplomáticas necesarias para deter os bombardeos e o asedio contra a Franxa de Gaza, incluído un programa de sancións contra o goberno de Israel e os seus responsables e a suspensión de relacións diplomáticas co Estado de Israel ata que non cumpra co Dereito Internacional e as resolucións das Nacións Unidas.

4. Demandar ao Goberno de España que cumpra coas obrigacións estipuladas no marco xurídico estatal e impoña un embargo militar a Israel, así como a suspensión de todos os programas de cooperación militar e de seguridade con Israel ata que respecte os dereitos do pobo palestino.

5. Instar ao Goberno de España e á Unión Europea a que tomen medidas diplomáticas firmes e efectivas para presionar a Israel a cumprir coas súas obrigas baixo o Dereito Internacional e a deter as políticas de ocupación e expansión en territorios palestinos.

6. Promover a educación e a sensibilización no noso municipio sobre a situación en Palestina, a través de actividades culturais, charlas e debates que fomenten a comprensión e o apoio a unha solución pacífica e xusta.

7. Reafirmar o noso compromiso cos valores de paz, xustiza e solidariedade internacional, traballando para que o noso municipio sexa un exemplo de apoio aos dereitos humanos e á resolución pacífica dos conflitos.