Ante a pasividade do Goberno do Estado, presidido por Pedro Sánchez, para dar as ordes pertinentes á avogacía do Estado para a presentación dunha demanda xudicial civil ante o Xulgado de Betanzos e así iniciar a vía xudicial que permita a recuperación do Pazo de Meirás para o patrimonio público, o grupo municipal de Sadamaioría anuncia que propoñerá ao pleno da corporación a adopción dun acordo no que se inste urxentemente ao Goberno do Estado a que se exerzan as accións oportunas.
Non consta que, dende a adopción o pasado 11 de xullo, por unanimidade do Pleno do Parlamento de Galiza, dunha proposición non de lei pola que se remitía urxentemente o Informe da comisión de expertos á Administración Xeral do Estado coa petición de que se realicen as accións legais co obxecto de reintegrar as torres de Meirás ao ámbito dos bens de dominio público da Administración xeral do Estado, o Estado nada fixera, polo que non se pode tolerar máis unha situación de pasividade absoluta.
O Estado non pode quedar inactivo ante as manobras fraudulentas por parte dos herdeiros do ditador Franco coa que se pretende anticipar e evitar os efectos legais de prosperar a vía xudicial que debe exercer o Estado para recuperar e incorporar o Pazo ao Patrimonio Público.
En definitiva, o Estado ten que activar xa a demanda civil no Xulgado de Betanzos e anotala preventivamente no Rexistro da Propiedade.
