Sadamaioría demanda da Xunta de Galicia que presente de inmediato no Xulgado a vía civil da acción de nulidade do título da fraudulenta adquisición por Francisco Franco do Pazo de Meirás, dado que consta acreditada a simulación dunha compra-venta que, en realidade, non foi tal. Dita acción de nulidade debe ser promovida pola Xunta de Galicia, en canto está lexitimada polas competencias que ten atribuídas en materia de tutela do patrimonio histórico-artístico, e, mais en concreto, coa lexitimación reforzada ao tratarse dun BIC (ben de interese cultural).
Sadamaioría entende que dita acción de nulidade debe ser presentada pola Xunta, con independencia do exercizo de accións xudiciais que poida exercer tamén o Concello de Sada en dito procedemento, ao estar tamén lexitimado para adherise ao mesmo.
A presentación de dita acción de nulidade debe levar tamén aparellada a súa anotación preventiva no Rexistro da Propiedade aos efectos de público coñecemento por terceiros, dado que como xa sinalou Sadamaioría, unha hipotética transmisión a terceiros do Pazo suporía unha dificultade engadida para a súa incorporación ao patrimonio público, aínda no suposto de que prosperase a acción de nulidade que se poida presentar ante o Xulgado.
Co obxectivo da incorporación do Pazo ao patrimonio público a custo cero, a urxencia da situación obriga a que os poderes públicos, así como as distintas mesas e xuntas (a constituída pola Xunta e a promovida pola Deputación), xa convocadas para os vindeiros días, definan e precisen canto antes, e á maior brevidade, cal é a estratexia xurídica e procesual para acadar tal obxectivo de incorporación a tal custo cero para as arcas públicas. Estratexia xurídica que a criterio de SM, e sen prexuizo doutras, debe comezar por presentación de dita acción de nulidade.
