A concellaría de Obras e Servizos pon en marcha o plan Sada Limpa, unha iniciativa coa que se pretende mellorar a limpeza das distintas rúas e espazos públicos do concello.
Para iso, procederase a realización de tarefas de limpeza empregando lavadoras con auga a presión, varredoras industriais e baldeadoras, completando os devanditos traballos con varridos manuais dos distintos sectores.
Para optimizar o resultado, desde o concello solicitouse a colaboración da veciñanza á hora de retirar os vehículos das vías públicas en que se vaia a intervir para así poder actuar nos distintos sectores de maneira integral.
Para o deseño do plan Sada Limpa, os técnicos municipais, xunto cos da empresa adxudicataria da limpeza viaria, dividiron o centro urbano de Sada en dez zonas de intervención que abranguen toda o contorno urbano. As actuacións en todas elas realizaranse os luns, mércores e venres do mes de outubro.
Unha vez rematado o centro urbano, Sada Limpa trasladarase aos núcleos e rueiros existentes nas distintas parroquias que conforman o Concello coa finalidade de estender o plan a todo o municipio.
O concelleiro de Obras e Servizos, Fernando Fariña, quere destacar que “esta é a fase inicial dun plan que se executará dúas veces ao ano (outono e primavera) sempre buscando mellorar os resultados obtidos e sempre co obxectivo de conseguir unha optimización dos distintos espazos públicos do Concello”.
Sada, 18 de outubro de 2020.
