O executivo local remarca a inaprazable necesidade de que Sada conte cunhas contas actualizadas logo de prorrogarse durante dous anos as de 2022.
O equipo de goberno mantivo varias reunións con todos os grupos políticos da oposición dende finais de decembro para que estes puideran facer as súas achegas.
O goberno local de Sada lamenta que PP, UxS e PSOE bloqueasen esta tarde a aprobación dos orzamentos de Sada para este 2024. Tal e como se viu informando por parte do goberno local, estábamos a falar das contas máis elevadas da historia, que permitirían non só executar os investimentos e melloras que a nosa vila necesita, senón tamén afrontar os custes que a suba de prezos propiciou na prestación de servizos públicos.
A intención de Sadamaioría é, e seguirá sendo, que Sada conte cuns orzamentos este ano. O goberno local non pode máis que manifestar o seu asombro ante unha oposición irresponsable que opta por pospoñer un debate orzamentario a pesar de que dende decembro coñecían o borrador das contas e dende entón puideron facer as súas achegas. Con todo, a apenas dúas horas de comezar o debate no pleno PP, UxS e PSOE envían ós medios un comunicado conxunto no que indican a súa intención de paralizar o debate co obxectivo de buscar una “reflexión máis profunda”. Dende Sadamaioría non entendemos nin compartimos esta posición, xa que UxS, PP e PSOE tiveron dous meses para transmitir ao equipo de goberno as súas propostas. Aquelas que PP e PSOE tiveron a ben compartir (en ningún momento por escrito, en ningún momento cuantificadas) foron valoradas polo executivo e, algunhas delas, incluídas no proxecto de orzamentos, ao igual que aquelas manifestadas polo BNG. Unidos por Sada non fixo en ningún momento ningún tipo de proposta, quizais por iso necesiten máis tempo para reflexionar.
A principal prexudicada polo bloqueo da oposición non será outra que a veciñanza de Sada, refén de tres partidos que unicamente están a pensar nos seus intereses personalistas e non no interese xeral dos veciños e veciñas de Sada.
O orzamento de 2024 ascende a 15 millóns de euros, un 30% máis que o último en vigor. Contempla subidas de até un 70% en partidas vinculadas ós servizos sociais; do 37% para servizos públicos básicos; dun 47% para bens públicos. Isto non son valoracións, son datos. Son máis cartos para investir nas parroquias; máis cartos para a veciñanza que máis o necesita; máis subvencións para as entidades sociais e deportivas; máis investimento para mellorar estradas e beirarrúas.
Sada, 19 de febreiro de 2024.